القرنبيط المقلى

القرنبيط المقلى
1-هنحط مية تغلى على النار مع ملح وكمون(الكمون علشان يشيل اى ريحه مش محبوبة للقرنبيط ويمنع الانتفاخات كمان)
2-هنقطع القرنبيط وردات متوسطة ونسقطه فى المية ونسيبه لحد ما يستوى بس ما يتهريش
3-هنطلع القرنبيط فى مصفاه ونسيبة يصفى
4-هنحط القرنبيط فى الدقيق لحد ما يتغلف وبعدين نحطه فى البيض المضروب مع ملح وفلفل اسود وكمون ويتقلى فى زيت حامى على النار لحد ما يتحمر ويتقدم
هى دى طريقتى فيه ناس بتحط على البيض بقدونس متقطع ناعم وبعدين اما تطلع القرنبيط من البيض تحطه تانى فى الدقيق بس بحس انه بيبقى تقيل شوية
على العموم جربوا الطريقتين وشوفوا الاحلى ليكم
القرنبيط بالبشاميل
1-هنسلق القرنبيط زي الطريقة اللى فاتت وبعدين نهرس القرنبيط شوية علشان يبقى حتت
2-هنعمل اللحمة المتعصجة زي ما شفنا قبل كده
3-هنعمل البشاميل زي ما قلنا قبل كده برضه
4-هندهن صينية زيت ونرشها بقسماط وبعدين نحط نص القرنبيط وبعدين التعصيجة وبعدين باقى القرنبيط وبعدين نحط البشاميل على الوش وممكن نضيف جبنة مبشورة وتدخل الفرن على نار متوسطة لحد ما تتحمر وتتقدم
القرنبيط بالصلصة
1-هنسلق القرنبيط زي الطريقه اللى فاتت
2-هنشوح بصله فى معلقتين زيت لحد ما تصفر
3-هنضيف صلصلة الطماطم ونسيبها تتسبك ونضيف الملح والفلفل الاسود ورشة كمون
4-هنضيف عودين بقدونس متقطعين ناعم على الصلصة
5-فى صينية هنرص القرنبيط ونضيف له الصلصه وندخلها الفرن لحد ما تتحمر وتتقدم مع ارز ابيض
القرنبيط بالصلصة ده عمرى ما جربته بصراحه بس حماتى بتقولى حلو وخفيف
واختى بتقولى طعمه مش عاطفى خالص ههههههه فجربوه وقولوا لى
4-